Go Home

LAKEEREIN ... ...

Lakeerein,unka astitva ek bindu se hi shuru hota hai aur ek bindu par hi khatam ,bas do bindu ko mila diya jaaye aur ban gayi ek lakeer.Lekin kabhi in lakeeron ke pare bhi dekha hai aapne,dekhein to milega apni jindagi ki lakeer bhi janm se shuru hoti hai aur fir poori jindagi chalta hai lekeerein banane aur mitane ka khel aur fir maut ko mil ke ye jindagi ki lakeer bhi poori ho jati hai.

  Sabse pehle jin lakeeron se aamna saamna hua woh thi takdeer ki lakeer aur bhagya/kismat ki lakeer,kabhi kisi pandit ne haath dekha to chaar paanch lakeerein aur dikha di fir chala lakeeron ko lamba aur chota karne ka silsila.
 Agar aapne kahani padi hon to yaad hogi birbal ki wo kahani jab akbar ne ek lakeer kheench di thi aur fir birbal se kaha ise bina mitaye chota bana do,birbal ne kya kiya ye to yaad hi hoga.Ek Napoliyan bhi tha ,use kisi ne keh diya ki uske haath main bhagya rekha hi nahi hai aur usne usi samay talwaar se haath main kaat ke ek lakeer bana di niyati ki banayi hui lakeer ko jhuthlane ke liye.Aise hi ek lakadhare ka per kulhadi se kat gaya aur ban gayi ek lakeer jisne use pahuncha diya ek aisi jagah jahan ka raja usi din mar tha aur woh ban gaya wahan ka naya raja.  Raja ho ya rank lakeerein sabke hoti hain kisi ke choti aur kisi ke badi jiske maathe ki lakeeron main jo likha ho wahi milta hai.

 Lekin ajeeb baat ye hai ki in lakeeron ke naam aur kaam bhi badalte rehte hai, Ghar ke bahar lakeer kheench do to ban gayi seema,apne chaaron taraf lakeer kheench do to ban gaya dayra,thoda sa lakeer ko ghuma ke bana do to ban gaya ghera,Ladki ke maathe par sindoor ki lakeer kheench di to ban gaya suhag ,matra ek lakeer se badal jati hai woh ladki se shtri main aur fir patni main aur badal jata hai uska astitva.  Ek lakeer lakshman ne bhi khinchi thi Seeta mata ke ird gird lekin dusht ravan ne kheench hi liya sita mata ko uske bahar aur fir janm hua ramayan kaa,lekin widambna ye ki ek lakeer paar karne ki wajah se sab kuch saaf hone ke baad bhi deni padi sitamata ko agnipareeksha.

Waise Lakeer banana aur mitana ek chota sa kaam dikhta hai lekin banane aur mitane ki niyati aur parinaam kya hota hai ye bas niyati hi jaanti hai.Ye lakeerein hi vibhajit karti hain do deshon ki seema ko aur ye lakeerein hi pradan karti hain manav ki jindagi main sahara,suraksha aur abhivyakt hone ki swatantrata,lekin yehi lakeer agar dil par khinch jaaye to fir dil hi bata sakta hai uska parinaam.

Aisi hi kuch lakeerein woh bhi uske charon taraf banane ke liye prayas kar raha tha, wo uske saath pichle paanch saal se pad rahi thi,dono college main the ,woh thoda sankochi swabhav ka tha isliye kabhi khul ke naa bol paya aur naa hi dikhne waali lakeerein bana paya use apne haath ki lakeeron main qaid karne ke liye.
Lekin jaane anjaane hi usne uske chaaron taraf ek adrishya qila bana diya tha,haan lakeeron ka kila.Woh hamesha uska aaspaas rehne ki koshish karta rehta tha ,kabhi uske chehre par pareshani ki lakeerein dikh jaayein to woh bhi bhujha sa ho jata tha aur jab tak uske chehre par mushkan na aa jaye tab tak uska man behlane ke liye kabhi asli kabhi manganant kisse sunaya karta tha ,baaton baaton main hi woh jaan leta tha pareshani ka karan aur fir lag jata tha us pareshani ke nidaan main.  Shayad use bhi uska sanidhya accha lagat tha isliye woh bhi jitna samay ho sake uske ird gird mandrate hue hi nikal deti thi.Kabhi akele ghar se bahar jana ho to turant kudti fudti uske ghar chali jaati thi use apne saath le jaane ke liye.Unhein koi bahar se dekhta tha to yehi sochta tha ki kitni acchi jodi hai kitna pyaar hai unme,lekin ye to woh dono hi jaante the ki unke beech khinchi hui hai ek adrishya si lakeer,lakeer adrishya thi fir bhi itni majboot ki chah kar bhi woh kabhi nahi tod paya use,aur woh,woh kaise todti us lakeer ko samaj ka dar aur kabhi na chup hone waale logon ke taane kaise sehti.

Paanch saal bahut hote hain aur jab college se nikal ke jindagi main sthayipan laane ka samay aaya to woh dono apna sara samaya ek doosre ke saath hi gujar dete the,shayad use ummeed thi ki woh ek din lakeer mitane main kamyab ho jayega aur fir woh apne ruphele pyaar se seechegi us naye rishte ko.
  Lekin idhar use hamesha dar tha ki agar woh nahi maani to ye dosti ka rishta bhi hat jaayega aur fir bina kisi lakeer ke un dono ke rishtey ka naa koi auchitya rahega na astitva.Aur shayad woh chahta bhi nahi tha ki use ek panchi ki tarah le aaye aur qaid kar de apne kile main.
 Inhi sab samay ki lakeeron ke beech chalti hui woh aayi, aankhon main aansoo aur raat bhar na so paane se ban gayi laal dorein aur haath main apni shadi ka nimantran patra le kar,jis par bhi ek lakeer thi lekin lakeer ke pare tha ek naya naam aur ek nayi duniya,uske sir uthane se pehle woh chali bhi gayi aise jaise kabhi aayi na ho.
 Usne sir utha ke chaaron taraf dekha fir dekha nimantran patra ek pal ko laga jaise toot gaya ho lakeeron ka qila lekin tabhi use yaad aaya ki qila to adrishya tha kisi ne jab bante hue hi nahi dekha to toot te hue kaise dekhega. Tab use laga ki agar  lakeer dikhti ho to use mitaya ya chota bada kiya jaa sakta hai lekin uska kya kare jo dikhta hi nahin..............