Go Home

Sapney ka saudagar... ...

Aaapne kulfi bechne wale,gubbare bechne wale ya jalebi bechne wale to bahut dekhe honge lekin aaj main ek aise insaan ki baat karne jaa raha hun,jiska kaam sapne bechna tha,kabhi khushhali ka sapna,kabhi hansti jindagi ka sapna,kabhi chamakti gadi ka sapna haan yehi to kaam tha uska lekin maine jab bhi use dekha uski aankhon main koi sapna nahi tha ,pata nahi kahan se sanjo ke lata tha sapne bechne ke liye.
Shayad uski umra 50 saal ki hogi aur kad khati ekdam samanya,uske kandhe aise jhuke rehte the jaise apne hi sapnon ke bhoj tale daba jaa raha ho.
Main uska naam to nahi janta tha lekin bacche use anand chacha kehte the,chacha to nehru chacha se aaya lekin anand kahan se aur kaise aaya ye shayad anand chacha hi janta tha.
Sapne bechne ke liye usne bahut se madhyam chun rakhe,paise ki to use kami nahi thi khandani tha ,kabhi nanhe se bacchon ke school main kahaniyan sunane jata tha ya yun kaho ki sapne baant ke aata tha,kabhi jatak kathayein to kabhi mangarant lekin rupheli kahaniyan aur kabhi maal road ke beech main khade ho kar
apne darshnik wicharon se sabka man lubhata tha,lekin jo ajeeb se baat thi woh yeh ki woh rajnitik gatiwidhiyun main bhi sargarmi karta tha ,kayi takatwar hastiyun se uski pehchan thi aur woh log uski ijjat bhi karte the ,woh netaon ke bhashan taiyyar karta gareebon ki khushali aur ramrajya laane ke aur kabhi kabhi manch par jaa ke bol bhi aata tha.
Mujhe uski yehi baat ajeeb lagti thi ek taraf to woh nirmal,komal man wale bacchon ko sapne dikha ke lubhata tha aur dusri taraf bhrasht mansikata wale netaon ke mann par bhi apna asar daal leta tha.
Kheir jo bhi ho, meri usse acchi dosti ho gayi thi,usse baat kar ke mujhe pata chala jaise ki woh ek sagar hai,jaane kya kya sambhal ke baitha hai,ek taraf gyan ka athaah sagar aur dusri taraf saare logon ka dard,shayad ye dard hi woh karan the jinse woh aise sunhele sapne bunta tha.

Ek shaam jab shimla main barf pad rahi thi aur maal road main ekke dukke log hi dikh rahe the,maine dekha ki
woh baitha hua tha,thoda muskurata hua aur thoda chup saa,nihar raha tha pahadiyun ko.Aaj uski aankhon main ek ajeeb si chamak thi,main chalta hua uske paas jaa ke baith gaya,kuch der tak to wahi khamoshi rahi fir usne apni chamakti awaaz main poocha,dekh rahe ho in pahadiyun ko,ye abhi soyi hui hain,barf ki chadar od ke.
Maine sach main neeche pahadiyun ki taraf dekha to mujhe sach main laga, jaise sab kuch soya hua hai pahadiyan bhi aur duniya bhi aur uska man bhi,lekin maine usse pooch hi liya ki aaj yahan kyun baithe ho
akele,jabki bahar itni thand hai aur saari duniya araam kar rahi hai apne apne gharon main, Usi din mujhe pata chala ki usne abhi tak shaadi nahi ki thi,kehta tha kabhi koi mili hi nahi jo mujhe samajh paaye,lekin usne ek baccha god liya hua tha,koi abhaga baccha jiske paida hote hi uske sir se maa baap ka haath uth gaya tha.
Aaj wahi baccha wapas aane wala tha ,25 saal ka ek safal insaan ban ke,logon se suna tha ki bahut bada aadmi ban gaya hai 25 saal ki choti si umra main hi,usne use 10 saal se hi padne ke liye kahin bahar bhej diya tha jisse wo jindagi main woh sab kuch kar sake jo anand kabhi nahi kar saka.

Baaton ke daur chalte rahe us din mujhe laga ki wastav main jo saari duniya ko hansata hai woh kabhi khud nahi hansta,hansta bhi hai to duniya ke liye,maine apni ghadi par najar daali to mujhe pata chala ki shaam kaafi ho gayi thi,barf ke saath raat ki kaali shyahi ne bhi watawaran ko gher liya tha,mujhe ghar wapas bhi pahunchna tha nahi to maa naraaj hoti ki naa jaane kahan rehta hai itni raat raat bhar.

Is baat ko main bhool gaya tha lekin ek do mahine beetne ke baad ek din achanak maal road par maine suna ki kuch log uske baare main baat kar rahe the,maine unse jaa kar poocha to pata chala ki woh apne ladke ke
saath hi chala gaya,shimla chor ke ,ajeeb laga mujhe kyunki usne ek din mujhse kaha tha main shimla tabhi chorunga jis din saans lena chor dunga,fir bhi woh chala gaya,logon se hi pata chala ki jaane se pehle woh kisi se bhi nahi mila,shayad kahin uske sapne toot gaye tha ya kaun jaane uske sapne haqeeqat ban gaye the.
Main bhi andar kahin isi paheli main ulajh r aha tha ki uske sapne kya the,lekin fir mujhe uski wohi gehri aankhein yaad aa gayi jinme mujhe woh sapna to kabhi nahi dikha ,jo uske liye wartmaan ban gaya......
Kaun jaane is baar woh kya bech gaya tha apne ladke ke sapne saakar karne ke liye.........