Go Home

Sili hui shaam... ...

Shaam dhundhli see thi ya kaho aankhon main kuch dhundhla saa tha , lekin thi shaam hi,aise hi naa jaane kitni shaamein uski jindagi main aayi thi,aati thi aur chali jaati thi ,peeche jaane kis jamane ka radio baj raha tha usme jagjit singh ki ghazal chal rahi thi "teri khusboo se bhare khat main baha aaya hun... ",is gaane ne us shaam ko aur bhi dhundhla bana diya tha.

 Aaj se 5 saal pehle ki woh shaam use yaad aa gayi jab woh uske kaandhe par sir rakh ke boli thi ki use pehle apna career banana hai,isliye agli shaam se woh milne nahi aayegi,tabhi usne saare khaton ka pulind bhi uske saamne rakh diya,aur ek second main tod diya woh ankaha rishta jo pichle 5 saal se chala aa raha tha,rishta hi nahi usne to jaise ek kaanch tod diya tha jiske tukde jahan bhi jiske bhi kadmon par lage ghayal kar gaye. Fir woh kya keh paya tha,kuch bhi to nahi ek ankahi udasi,ek ankahi jindagi ke sahare wahan se khada hua aur chal diya,peeche chod gaya kuch khat jo baarish main bahe jaa rahe the,ek baar to man hua ki samet le sab ,lekin yaadein bhi kahan sameti jaati hain,unka to kaam hi hai gahe bagahe chale aana aankhon ke saamne aur kabhi kabhi laga dena aankhon main ek shyanik sa motiyabind.

 Us din use laga ki yaadon ko hona hi nahi chahiye,jisne bhi banayi yaadein bana ke accha nahi kiya,sabki yaadein chali jaati to kitna accha hota,sabke paas hoti hain yaadein kabhi acchi kabhi buri,acchi yaadein utna nahi hansati hain jitna buri yaadein rula deti hain,fir auchitya hi kya raha yaadein banane ka,khair aise uljalool wichar hamesha uske man main aate the,uska bas chalta to woh aag se garmi nikal deta aur chor deta ek sili hui thand usi sili hui shaam ki tarah jis shaam woh uski jindagi main sili hui shaam laga gayi thi.

Waise to usne apne ko bahut sambhala,sab kuch chor ke apna padai main lag gaya aur woh shehar bhi chor diya,jab shehar chora tha usne man hi man soch liya tha ki kabhi nahi aayega wapas fir us shehar main jahan uske paas,ujdi hui yaadon aur anant main jhoolte sapnon ke jhoole ke alawa. Lekin kab tak rokta apne man ko,ek raat andhere main hi wapas aaya tha usi shehar main jahan ki bheed bhari galiyun main bhi use bas tanhai milti thi,isliye woh is baar aaya tha jisse ki log uske andar ki tanhai ko beech bajaar main na bech dein,aur ye log bhi uske apne the jo un donon ke baare main sab kuch jaante the aur jaane anjaane hi usse uske baare main pooch lete the,kisi ka kabhi uddeshya nahi hota tha uske fool se man ko chot pahunchana lekin unhein bhi kahan pata tha ki achanak basnat ke baad patjhar kaise aa gaya.

Tabhi use pata chala ki usne bhi shehar chor diya tha,kisi ko kuch pata nahi tha uske baare main use laga jaise fir kisi art movie ka climax dekh raha ho jahan darshak ko aadhe main chor diya jata hai,jaisa darshak chahe waisa hi ant banaye,koi shukhad banata hai to koi dukhad ant.
Lekin is baar usne koi ant nahi banaya na sukhad na dukhad ,use laga ki kisi bhi kone par jaaye silsila to antheen hi chalta rahega,woh dhage kabhi nahi judte jinhein jodne wala koi nahi hota. Uske baad na woh wapas us shehar gaya na kabhi uski iccha hui,uske man main santosh tha is baat ka nahi ki woh use chor ke chali gayi ,is baat kaa ki usne woh sili hui shaam dho li thi jo na jaane kitne samay se use pareshan kar rahi thi.
Woh uth khada hua ab shaam to nahi thi aur andhera bhi hone laga tha lekin man ke andar ujala tha ,uske kadam ghar ke andar ki taraf chal pade ,peeche radio gana baja raha tha "chalte rehna hai musafir ka naseeb...apni marzi se kahan apne..."