Dheere dheere bada hua to udherbun ka shabdarth samajh main aane laga,laga ki ye jindagihi udherbun ka hi khel to hai,ham sabhi bunte hain kabhi bhavishya,kabhi sapne aur kabi aashaain, fir koi shararti sa baccha aake sab udher deta hai,aur ham fir shuru ho jaate hain bunna,ye khel sari jindagi chalta rehta hai jab tak bunne ke liye kuch bacha hi nahi reh jata hai.

Baat purani hai, lekin baat purani hi na hone lage to itna bada itihas kahan se banta aur agar inhi baaton ko sanjo ke rakhe to hi to yaadein ban jaati hain.
Bachpan main jahan main rehta tha uske paas hi ek nadi baha karti thi,mujhe uske paas jaane main ek ajeeb sa sukoon mila karta tha ,nadi ke aaspaas ek ajeeb sa shor rehta hai jo kabhi main to sukoon deta hai aur kabhi ajeeb si bechaini.

Ek din aise hi nadi ke aaspaas ghoom raha tha ki, kuch naya sa shor sunayi diya,man kautoohalwas hee us ore khinch gaya,paas jaa ke dekha to ek naya ghar dikhai diya,ek chota sa ghonsla jahan ek tithari ne ande diye hue the,fir kya tha man ko to ek naya bahana mil gaya,roj subah school jaane se pehle aur aane ke baad wahan jaane kaa, ki ek din in chote se andon se bacche niklenge aur fir nadi ke kinare ek chota sa naya gharonda ban jayega.

Waise bahane se yaad aaya,jab main chota tha to school naa jaane ke liye roj naye bahane banaya karta tha,saath wale bacchon ke paas to gin ke 2 ya 3 bahane hua karte the,kabhi pet dard,kabhi sir dard ya kabhi taang dard,lekin mere bahane hamesha naye hote the aur kisi ko kabhi shaq bhi nahi hua,mere mata pita ko to aaj bhi pata nahi hoga ki woh sab bahane the. Khair ye to rahi meri baat jis din se tithari ne ghonsla banaya tha us din se mere saathiyon main mera raub kuch bad gaya tha,kyunki unhein pata tha ki sirf mujhe pata hai ki ghaunsla kahan hai aur un andon ke darshan bas main hi unhein kara sakta tha.
Mere acche doston main bas 2 hi the aur ham 3 log khoob mil ke dhamal machaya karte the,lekin ham teenon main ek bahut hi uddand prakriti ka tha,use bas bahana chahiye hota tha kisi ko bhi pareshaan karne kaa.maine sirf apne do doston ko hi ghaunsla dikhaya ttha,lekin us din ke baad se main main ek shanka rehti thi ki kahin mera uddand dost us ghonsle ko nuksaan na pahuncha de.Main bas thoda sa sawdhan rehta tha us gharonde ke basne ke liye.
Roj ki tarah us din bhi main nadi kinare nikal to ek naya sa shor sunayi diya jaisa pehle kabhi suna hi nahi tha,man shanka se ghabrane laga ajeeb ajeeb se vichar aane lage fir main man hi man apne dost ko kosne laga ki usne hi kuch kiya hoga,man glani se bharne laga ki main bhi is paap ka hissedaar hun,kyunki maine hi to woh ghonsla use dikhaya tha.